كتب الأستاذ الشاعر/ ( أسامه جديانه)◇◇لما تلاقى نجوم السما◇◇

لما تلاقى نجوم السما
بتقول ياغرام
لما تلاقى قمر الليل
هيمان م بنام
تبقى قلوب العاشقين
معزوره ياحرام
لما تلاقى كل البساتين
فيها الأحبه أتنين أتنين
لما تلاقى الورده البلدى
بتغازل الفل والياسمين
لما تلاقى شجر الليمون
بيضلل على الرياحين
لما تلاقى السحاب
قطراته بتروى قلبين
لما تلاقى النهر الغالى
بيتبختر بين شطين
يداوى كل الجراح
يسقى القلوب السهرانين
لما تلاقى الشمس ترفض تشرق
لجل م يتفرق قلبين
يبقى الحب نسيمه عليل
يملى قلوب العشاق حنين
ودراعات الدنيا مفروده
تعطى الأمان للسهرانين
يبقى الحب ساحات مزروعه
تحصده نظرات العين
تفرد شراع المحبه
جوه قلوب المجروحين
بتخفف كل آلامهم
من جرح الهوى والسنين
                           ( أسامه جديانه)