كتب الأستاذ الشاعر/#باسم_موسى◇#بالعامية_المصرية◇

#بالعامية_المصرية

بعد دا كله و جاي يلوم
                               🔹🔹🔹🔹🔹
دي غلطتي
إني سبت ايديا من ايد نفسي فـ دنيتي
و قلت أمشي برجل غيري و أشق بيها سكتي
ناحية شروق الشمس أبدأ خطوتي
قرَّبْت حبة وبعد حبة تهت...  حسيت غربتي
ولْقيتني غرقان في الضباب
و كل سكة آخرها بيودي لسراب
طب فين أوجه وجهتي؟؟
ومشيت في أي طريق ما كله اتساوى فـ نظرتي
أصل الضباب غطى عينيا حجب في عمري رؤيتي
وسمعت كلمة بعد كلمة... من صاحبي، و خالي، و عمتي
و عمري ما فيوم جالست نفسي نفكر ف أمورنا سوا
و عمري ما قعدت معاها أشوف لمشكلتي دوا
وسبت نفسي لفكر غيري. قشة لعب بيها الهوا
و جاي دلوقتي الندم يجرح في روحي
جاي يزود الأنين بآلام جروحي
جاي يسيِّل دمعتي و نغمها نوحي
جاي يعذب قلب عاش طول عمره يحدوه الأمل
جاي يقوله ايه حصدت من العمل؟؟
جاي بينكت جرح عدى من سنين بدا يندَمل
قول جايّ ليه يا ندم !!
بإيه تفيد قلب انصدم ؟؟
على حرف عمره قعد بينتظر النهاية
مهما تكون من قوتك عمرك ما حتغير حكاية
خلصت خلاص وانحكت
كنت تجيني يا ندم قرب البداية
يمكن ما كات عيني بكت
كنت ساعتها حأقدرك و حتبقى إيد
عليها ممكن أتسند.. منها استفيد
كنت حتبقى شمعتي فـ قلب الضلام
أما في حالتي يا ندم ولا ليك كلام
جاي و فاتك المعاد... و لا تستحق حتى السلام
كان ممكن اللوم للأمل يفوَّقه لو هو نام
أما في حالتي قلتلك مات الكلام
ما حينفع الميت هوا و لا يجدي فيه كلمة ملام
                              🔹🔹🔹🔹🔹
#باسم_موسى